Wat gött et em Solig für Nöüegkeïten? Et stong em Blättschen on der Soliger Morgenpost


Sportvereïne on der Hangel em Solig prakesieren, wie se Energie sparen können. Met dem Heïzen on dem warmen Water well men örklech ömgonn. Lickersch sall et äwwer de Chreßdahslöühten gewen.


Der Baas vam Fördervereïn Itterdall, Hartmut Lemmer, hatt met mieh Besüökern em Freïbad gerechnet. Vawegen der huhen Reperaturkösten,

es der Vereïn op jiëden Euro agewiësen.


En der verliëden Weeke es der Peter Amann em Auler van 71 Johren ganz plötzlech gestorwen. De liëweswerte Köüßler, de et Herte an der reihten Plaaze hatt, wierd der Koustweilt en der Begeende aleg fehlen.


Nohdem sech Mieter on Vermieter en nem Hus gekäbbelt hant, es de Striet ut dem Ruder geloupen on der Vermieter on sinnen Jong, hant den Mieter met ner Dreckplate verschwardt, offwall dem sin Kengk dobeï stong.


Ter 50. Zöppkesmohltiet komen am verliëden Friedag rongk 300 Besüöker en den Cliemessaal. Et kounen 35.000 € an de Kenger-

stuowen gegewen werden.


Ouch de Bergeschen truren öm de Queen. Se hät sugar Vürfahren en der Begeende. Anna von Kleve es em Schlot Burg opgewahßen on geng 1539 noh Englangk, öm den König Heinrich te hieroden.


Op dem Zöppkesmaart wor dös Johr nit alltuo völl los. Man hatt dat Gefüöhl, de Lütt haulen de Gröschker beneïn.


Seït 40 Johren besteïht alt der „Dütsche Alpenvereïn“. Drömswellen hant se dat en ehrer nöüen Geschäftsstell op der Stresemannstroote gefiert.


16 Dag noh ehrem Start beïm Möngstner Bröggenfest, sind die Deïlnehmer van der „Six Bridges Rally“ wiëder onger der Bröck akuomen. Van der 6.000 km langen Tour hant se 32. 000 € metbraiht, die gespendet werden.


En der Kolfert verklörden der Andreas Groß van der Berger-Gruppe, interessierden Bürgern, wie Sensoren an der Wopper erkennen, datt et Water stiegt on de Lütt en der Begeende vürm Huhwater geschötzt werden können.


Nen Deïl van der Viehbeekdallstroote wierd aff Mondag van Ohlegs aan für eïn Weeke gesperrt. Grongk derfür sind Utbesserengsarbeïden.



15 bes 20 Persunen sallen sech am verliëden Mondagowend am Müöhlen-

plätzken gekloppt hann. Twei hant sech dobeï verletzt. Te glieker Tiet sind sech op der Lühdorper Stroote ouch en Dutzend Lütt en de Hoor geroden.


Der Kaufhof-on der P&C-Bou werden iersch 2023 affgeriëten. An der Plaaze sallen 81 Wohnenger für Senioren entstonn.


Engs September bout de dütsche Telekom die Fonkmasten op dem Verwaltengkstuorn der Firma Forst aff. Drömswellen wierd et Internet op der Krohenhüh langksamer.


Dat wor et Nöüeste ut dem Solig van den Hangkgeschmedden. Tesamegestault on gelesen van Judith Schreiber.